SP Graubünden / PS grischuna / PS grigionese Medienmitteilung 9.05.03: Nagina tema da l’iniziativa da sanadad "Tgi che gudogna pli pauc duai pajar pli pauc!" Questa pretensiun clera e evidenta annunzia il placat unifitgà da la ps che penda actualmain sper la Deutsche Strasse tar la rondella da Masans. Sin il placat vesa ins ils purtrets da la tgirunza Christine Schnyder e dal miliunari da pruducts farmaceutics Daniel Vasella in visavi l’auter. Quels dus pajan la medema premia da chassa da malsauns malgrà la differenza d’entradas drastica. L’aboliziun da quest sistem da premias da chau asozial e unic en Europa stat el center da l’iniziativa da sanadad da la PS che vegn votada ils 18 da matg. Las premias da chau duain vegnir remplazzadas tras contribuziuns basadas sin la forza finanziala sco er tras entradas da la taxa da plivalita. Ils iniziants spetgan quatras ina stgargiada massiva da las classas d’entradas bassas per fin 80% da la populaziun. Ils fauturs da l’iniziativa refuseschan la campagna da tema dals comites burgais. Las secziuns grischunas da la partida socialdemocratica, dal sindicat vpod (Uniun dal personal dals servetschs publics) sco er da las uniuns professiunalas SBK (Uniun svizra da las professiuns da tgira da malsauns) e da la SBGRL (Uniun svizra da professiuns da geriatria e tgira a lung temp) s’engaschan cummunablamain per il fatgs da l’iniziativa. Nathalie Ackermann-Frösch, commember da la suprastanza dal vpod e tgirunza:"In bun provediment da sanadad è ina pitga centrala dal service public. Las pazientas ed ils pazients derivan da tut las classas d’entradas. Grazia a l’iniziativa da sanadad è in tractament da aulta qualitad e optimala er garantida en avegnir per tuts. Mo las grevezias da las premias èn repartidas pli gist." Il patratg da solidaritad stat er en il center per la presidenta da la SBGRL Klara Schweizer:"Blers umans pli vegls èn stads assicurads mez privat u privat durant la mesa vita senza mai giudair grondas prestaziuns. Oz na pon els gnanc prestar da pajar la premia da basa generala. In Gea tar l’iniziativa procura per pli solidaritad tranter las generaziuns." Il deputà da la ps e medi Mathis Trepp punctuescha expressivamain che l’iniziativa contribueschia er a la reducziun dals custs:"L’iniziativa porscha ina basa constituziunala effizienta per metter danovamain en urden nos sistem da sanadad. La confederaziun survegn las cumpetenzas per regular la medischina da prestaziun e per coordinar la planisaziun da sanadad chantunala.